前排美國總統特朗普又發表種族歧視言論，批評4個民主黨少數族裔眾議員，叫佢哋討厭美國嘅話就離開美國。呢番言論引嚟廣泛批評，眾議院仲通過譴責總統議案，係一百年來首次。望返歷史，美國種族歧視自獨立之後無幾耐就已經出現，只係唔同時代有唔同嘅歧視對象。其實特朗普祖父輩係嚟自德國嘅移民，而家特朗普身為總統，居然又歧視其他移民，都真係幾諷刺！

美國响18世紀末獨立，當時嘅人主要都係來自英國同蘇格蘭，信奉基督新教。之後開始越嚟越多信奉天主教嘅愛爾蘭人移民去美國，喺1830年代開始美國出現歧視，發生反愛爾蘭人騷動，又有商戶拒絕聘請愛爾蘭人。到咗1840年代開始，就開始多德國人移民到美國，由於唔少德國移民都係信奉天主教，於是就同愛爾蘭人一樣受到歧視。

喺1860年代南北戰爭之後，美國開始喺西岸鋪鐵路，請咗唔少華人過去打工，後來鐵路公司因為華工刻苦耐勞、效率高，而且人工平又唔會搞事，於是大量引進華工，令當地白人不滿。政客以種族歧視言論醜化華人，甚至默許白人激進組織向華人施暴，反華情緒慢慢於美國白人社會蔓延。响1882年，共和黨參議員約翰．米勒（John F. Miller）向國會交提排華法案，最終國會通過法案，10年內禁止華工去美國、禁止華人取得美國公民身份等。去到1943年，因為考慮到美國同中國聯合抗日，呢條法案先至被廢除。後嚟喺奧巴馬總統任內，國會就曾通過法案，就當年嘅排華法案向所有美國華人正式道歉。

但到咗特朗普接任總統之後，種族歧視問題越演越烈，喺2017年2月有一名韓裔女子同未婚夫，以及2個朋友，經Airbnb喺美國訂咗間房，點知冒住風雪去到間屋嘅時候，屋主就因為佢哋係亞洲人而取消booking。當個韓裔女子聲言向Airbnb投訴，個屋主就話因為咁美國先有特朗普，拒絕認錯，又話唔會俾外國人喺美國指手劃腳。以上種種都顯示，美國人嘅歧視心態可以話係根深柢固。

圖片為1882年美國廣告、特朗普，取自網絡。